Duhet ta pranojmë që nga Turqia, gjatë gjithë atyre viteve pushtim, kemi marrë edhe plot ëmbëlsira të shijshme. Është vetëm mendimi im, apo turqit janë mjeshtra kur vjen puna te ëmbëlsirat?
Jo vetëm që janë të shijshme, edhe pse pak të rënda (mendoni shërbetin e bakllavasë!), por disa ëmbëlsira të caktuara janë edhe fantastike në pamje, si për shembull llokumet e famshme turke, me arra apo bajame.
Si të magjishme që janë, llokumet janë përfshirë edhe në librat dhe filmat e mirënjohur të serive “Kronikat e Narnias”, kur Shtriga e Bardhë e magjeps njërin prej vëllezërve kryesorë të historisë me këto ëmbëlsira tërheqëse. Fama e llokumeve është përhapur edhe më tej në Perëndim.
Për më tepër, kanë edhe një emër të bukur “Turkish Delights”, që e mbërthen mirë idenë e llokumeve të shijshme.
Përbërësit (për rreth 48 copë)
150 gr sheqer
770 ml ujë
lëngu i një gjysmë limoni
125 gr niseshte misri i situr
¾ lugë çaji krem tartari (nëse nuk gjeni në markete, interesohuni në dyqanet “Neranxi”)
1 ½ lugë ujë trëndafili për shije (ose shije të tjera nëse dëshironi)
xhel ngjyrues ushqimor, me ngjyrë sipas dëshirës tuaj (ngjyra e kuqe është më e zakonshmja)
70 gr arra ose bajame të qëruara të prera (opsionale)
30 gr sheqer pluhur
vaj perimesh
Përgatitja
1. Vishni me qese plastmasi dhe lyeni me vaj një tavë katrore 20×20 dhe lëreni mënjanë. Hidhni 150 gr sheqer, 235 ml ujë dhe lëngun e limonit në një tenxhere mbi zjarr mesatar dhe trazojini derisa sheqeri të tretet. Lërini të ziejnë derisa shurupi të jetë trashur paksa. Nëse keni termometër kuzhine, mateni shurupin me të dhe lëreni të ziejë derisa të arrijë temperaturën 115 gradë Celsius (njohur si faza soft-ball e sheqerit).
KËSHILLË: Nëse nuk keni termometër, në një gotë me ujë të ftohtë fusni një lugë çaji nga shurupi dhe duhet të formojë menjëherë një topth, i cili e humb formën e tij kur del nga uji i ftohtë (soft-ball, topth i butë). Nëse e lini më tepër në zjarr sheqerin, topthi sa vjen e forcohet, ndërsa nëse e lini më pak seç duhet, shurupi thjesht rrjedh lirisht, duke formuar fije të holla në ujë. Juve ju intereson temperatura kur shurupi merr formën formën e topthit të butë.
2. Kombinoni 95 gr niseshte misri me kremin e tartarit dhe 180 ml ujë në një tas dhe trazojini derisa të bëhet një masë e njëtrajtshme. Pjesën e mbetur të ujit (355 ml) vëreni të ziejë në një tjetër tenxhere. Kur të nisin flluskat, shtoni përzierjen e niseshtesë dhe përziejini mbi zjarr mesatar në mënyrë konstante. Përzierja duhet të bëhet mjaft e trashë, si ngjitës.
3. Hidheni shurupin ngadalë te përzierja e niseshtesë, duke përzier vazhdimisht, dhe lërini të ziejnë për rreth 1 orë e 15 minuta në zjarr të avashtë, duke përzier herë pas here, derisa të bëhet ngjyrë të artë te çelur.
4. Pasi të jetë zier, shtoni ujin e trëndafilit për shije, ngjyrën e preferuar xhel, aq pika sa të marrë nuancën e duhur dhe bajamet e copëtuara apo arrat, nëse i doni me to.
5. Hidheni përzierjen në tavën me qese dhe vaj dhe lëreni mënjanë për së paku 4 orë, ose derisa përzierja të ngrijë.
6. Kombinoni sheqerin pluhur me niseshtenë e ngelur (30 gr) dhe pluhurosni një sipërfaqe me të. Hidhni mbi sipërfaqe brumin e përgatitur të llokumeve dhe pluhuroseni edhe sipër me sheqer. Me një thikë të mprehtë, prisni kuba me brinjë 2.5 cm nga brumi. Mbulojini mirë kubat në sheqerin e mbetur dhe shërbijini në një tas me dizenjo të bukur.
Show Comments (0)