I mbani mend pikat “Cinnabon” që u hapën nëpër Tiranë? As nuk i frekuentoja aq shumë, thjesht tek-tuk për pak neps, por sërish më erdhi keq që u mbyllën!
Mbase edhe shqiptari thjesht nuk është tipi i cinnamon rolls-ave: mund t’i konsumojë një herë në kaq, por vetëm kaq ama!
Megjithatë, tani që dyqanet “Cinnabon” u mbyllën, nuk kemi se ku t’i marrim këto ëmbëlsira tejet të shijshme. Na ngelet vetëm t’i gatuajmë vetë!
Përbërësit
475 ml qumësht
115 gr gjalpë i shkrirë
100 gr sheqer
1 paketë e vogël maja
560 gr miell
1 lugë çaji pluhur pjekjeje (baking powder)
2 lugë çaji kripë
100 gr miell (hidhet dy herë)
170 gr gjalpë i butë për t’u përhapur
165 gr sheqer kaf
2 lugë gjelle kanellë
Për kremin
113 gr krem djathi
2 lugë gjelle gjalpë i shkrirë
2 lugë gjelle qumësht
1 lugë çaji ekstrakt vanilje
160 gr sheqer pluhur
Përgatitja
- Në një tas hidhni qumështin, gjalpin e shkrirë dhe sheqerin dhe përziejini bashkë. Hidhni mbi përzierjen majanë dhe lëreni mënjanë për 1 minutë.
- Shtoni 560 gr miell dhe përziejini derisa të bëhet brum, për ta mbuluar më pas me peshqir dhe lënë mënjanë për 1 orë, që të fryhet.
- Hidhni pluhurin e pjekjes dhe kripën, shtoni edhe 100 gr miell, dhe përziejini sërish. Vëreni brumin në një sipërfaqe të bërë me miell dhe shtrojeni me petës në formë drejtkëndore.
- Përhapeni gjalpin e butë mbi brumin drejtkëndor, në të gjithë sipërfaqen e tij, dhe spërkatni sheqerin kaf dhe kanellën mbi të për ta mbuluar të gjithë brumin.
- Kapni anën më të gjatë të brumit dhe nisni ta rrotulloni, për të krijuar një rul, të cilin do ta ndani për të krijuar cinnamon rolls.
- Mos e ndani me thikë, pasi do ta shtypni formën rrethore të tyre, por përdorni fill (edhe dentar madje), duke mbledhur me të brumin si në foton e mëposhtme dhe priteni në trashësi rreth 3.5-4 cm, ose sipas dëshirës tuaj. Filli është më i butë dhe nuk e shtyp brumin, por gjithsesi mund të provoni fatin tuaj edhe me thikë. Rregullojeni formën pasi ta keni prerë.
- Vërini cinnamon rolls-at në tavë, mbulojini me letër plastike dhe lërini të pushojnë për 30 minuta.
- Ndërkohë, përgatisni kremin që hidhet sipër tyre. Në një tas, hidhni kremin e djathit, gjalpin e shkrirë, qumështin dhe vaniljen dhe përziejini të gjithë bashkë mirë. Shtoni dhe sheqerin pluhur dhe përziejini sërish.
- Cinnamon rolls-at futini në furrë me 180 gradë për rreth 25-30 minuta, derisa të piqen mirë.
Shtojuni sa janë të nxehta kremin e përgatitur, dhe mahnituni nga shija e tyre.
Show Comments (0)