Shën Valentini nuk ka kuptim pa çokollatë. Ndaç si dhuratë për ju, ndaç në ëmbëlsirën e natës tuaj romantike (nuk gjykojmë edhe nëse e merrni në dhomën e gjumit, përkundrazi), festa e dashurisë vjen bashkë me ëmbëlsirën më të dashur në botë.
Në vend që piqni e digjni ëmbëlsira e kek, ju këshillojmë vetëm kaq: fruta & çokollatë të shkrirë.
Përbërësit
Fruta të ndryshme, luleshtrydhe, banana, dardha, mollë, ananas
200 gr çokollatë që shkrihet
50 ml ajkë e lëngshme
20 gr gjalpë
20 gr sheqer
Përgatitja
- Vendosni frutat në një pjatë të madhe. Frutat që duhen prerë pritini në copa të mëdha. Që të mos nxihen, si dardha e molla p.sh., zhytini për pak kohë në ujë me lëngun 1 limoni dhe thajini.
- Shkrini çokollatën në banjomari, duke vendosur tasin e sigurt nga nxehtësia me çokollatë sipër një tenxhere me ujë, pa e prekur ujin. Zieni ujin dhe përzieni çokollatën derisa të shkrijë.
- Shtoni në të ajkën, gjalpin dhe sheqerin, derisa të bëhet një krem homogjen. Hidheni çokollatën në një enë të përshtatshme, duke e lënë pak të ftohet.
Zhysni frutat në çokollatë dhe paçi një Shën Valentin të ëmbël.
Show Comments (0)